Hver er Reza?

Alliance française stendur fyrir kynningu á franska leikskáldinu Yasminu Reza föstudaginn 22. febrúar kl. 18:00 í húsnæði Alliance française við Tryggvagötu 8. Yfirskrift kynningarinnar er „Hvers vegna hlær fólk á leikriti sem heitir Vígaguðinn?“ Kynningin er öllum opin og tekur dagskráin um klukkustund.

Vígaguðinn, sem var frumsýnt í Sviss fyrir rúmu ári, er nýjasta leikrit Yasminu Reza, en hún er eitt allravinsælasta leikskáld samtímans. Verk hennar hafa á undanförnum árum verið leikin út um allan heim, en frægasta leikrit hennar er Listaverkið, «Art», frá 1994 sem sló í gegn á Íslandi í uppsetningu Þjóðleikhússins árið 1997. Yasmina Reza hefur fengið Laurence Olivier-verðlaunin í Bretlandi, Tony-verðlaunin í Bandaríkjunum og oftar en einu sinni Molière-verðlaunin í Frakklandi.
 
Reza hefur einnig sent frá sér bækur af ýmsu tagi. Nýjasta bók hennar fjallar um forseta Frakklands sem hefur heldur betur verið í sviðsljósinu að undanförnu en Reza fylgdi hinum umtalaða Nicolas Sarcozy eftir þegar hann háði kosningabaráttu við Ségoline Royale í haust.
 
Á kynningunni mun Melkorka Tekla Ólafsdóttir, leikstjóri sýningarinnar í Þjóðleikhúsinu, sem hlaut menntun sína í París, fjalla um Yasminu Reza og leikverk hennar. Í lok kynningarinnar býður franska sendiráðið upp á léttar veitingar.